Doppan

Kjóllinn hennar Örnu er loksins tilbúinn.

Hann var frumsýndur á rauða dreglinum (í Reykjafold) um páskana og verður þessi líka fíni “sautjándajúníkjóll”!!

Arna er alsæl með hann og er farin að nota hann á leikskólanum (tekur því ekki að hafa svona kjóla of mikið spari, barnið vex jú, en brókin ekki :))

Eina sem ég gæti sett út á hann er að hálsmálið er helst til of lítið og þröngt, Arna þarf að trooooooðððða honum yfir höfuðið á sér… ég held að hún sé ekki með óvenju stórt höfuð! Ætli ég geri ekki bara smá klipp aftan á og setji litla tölu til að stækka málið?!

Í fyrra (síðsumars) var ég stödd í Storkinum að kaupa eitthvað smálegt garn… þá henti mig, það sem stundum gerist, að ég fór að fletta blöðum og bókum. Nýjasta Debbie Bliss (spring/summer 2012) blaðið lá á borði og ég fór að blaða í gegnum það. Sá ég þá þennan líka sæta rauða “sailor” prjónakjól á litlar dúllur. Og, eins og hefur gerst áður, rankaði ég allt í einu við mér út í bíl með poka í hendi… alveg steinhissa kíkti ég í pokann og þá var bara eins og einhver hefði keypt handa mér blaðið OG garnið í kjólinn… það átti bara eftir að setja kjólinn saman!!!

Eftir að hafa prjónað talsvert úr íslensku ullinni (sem ég b.t.w. elska!) og flest prjónað í hring, langaði mig að prófa að prjóna svona “alvöru” flík úr fínlegra garni. Uppskriftin er auðvitað ekkert nema skammstafanir og það getur verið auðvelt að hræðast svoleiðis og henda þessu frá sér. Svo er svo skrítið að það er eins og útlenskir prjónarar hafi aldrei heyrt um að prjóna í hring! Alltaf prjónað fram og til baka, bakstykki og framstykki prjónuð sér og svo saumuð saman á eftir… jæja, ég var ákveðin í að komast yfir hræðsluna og hófst handa. Ég byrjaði á bakstykkinu, fram (sl) og til baka (br), fram (sl) og til baka (br), fram (sl) og til baka (br)… milljón umferðir. Vá hvað það er leiðinlegt að prjóna brugðið til baka, eins og það er gaman að spítta í og prjóna slétt að framan! Bakstykkið gekk annars bara vel, ekkert mál að forma ermar og auðveldara að skilja uppskriftina en maður hefði haldið í byrjun.

Nú kemur snilldin! Ég tók næstum klárað bakstykkið með mér norður á Löngumýri og þar sá Fríða Ágústsdóttir mig vera að prjóna… hún laumaði fingrunum í prjónana og sýndi mér miklu skemmtilegri leið (finnst mér) til að prjóna brugðið til baka… og mér finnst sú aðferð líka gefa miklu fallegra prjón. Maður snýr ekki stykkinu til að prjóna brugðið heldur prjónar maður til baka frá vinstri til hægri. Og þetta er ekkert flókið heldur (einfaldara en “okkar brugðning”). Þegar ég kom heim fann ég þessar leiðbeiningar á Youtube ef þið viljið kynna ykkur þetta.

Fríða sagði mér að hún hefði lært þessa aðferð þegar hún fór eitt sinn á námskeið í myndprjón. Stundum er eins og maður eigi að hitta ákveðna einstaklinga, engar tilviljanir. Það vill svo til að framstykkið á kjólnum er með myndprjóni í lokin!! Ég ákvað því að prjóna framstykkið allt svona. Það verður að vísu aðeins fastar prjónað en garnið er svo fínlegt að ég held ég muni alveg getað teygt pínu á því til að það passi við bakstykkið.

Myndprjón opnaði fyrir mér alveg nýja vídd. Allt öðruvísi en þegar við prjónum lopapeysumynstur því bandið aftan á fer ekki yfir mynstrið heldur þarf maður að vera með marga spotta hangandi í “myndinni”. Þetta var þó nokkur áskorun en eftir mörg Youtube myndbönd og fjárfestingu í rafrænni myndprjónsbók (myndprjón = intarsia knitting) gekk þetta að lokum og var bara nokkuð skemmtilegt… seinlegt, en skemmtilegt 🙂 – ég fann líka þessa snilldar ábendingu á netinu; að vefja garni upp á þvottaklemmur, kemur sér líka vel í útsaum, þ.e. vefja útsaumgarninu upp á þvottaklemmur.

Nú á ég bara eftir að sauma bak- og framstykkin saman og máta kjólinn á Örnu mína. Það er orðið ansi langt síðan ég byrjaði á kjólnum. Mér sýnist hann passa á hana, hann gæti þó verið  heldur stuttur… ég redda því þá bara með blúndu neðst eða hekla eitthvað sætt neðan á hann… fullkominn 17. júní kjóll!

Ég set inn myndir af henni þegar hún verður komin í hann 🙂

Það styttist í snáðann (4 vikur eftir í settan dag)… samt erum við svo róleg yfir þessu öllu (fjórða barn!) – höfum eiginlega ekki gert neitt tilbúið. Búin að kaupa bleyjur, hekla teppi og prjóna þennan ungbarnapoka. Ég er reyndar þeirrar skoðunar að það er mikil gerviþörf í gangi þegar kemur að barneignum (sko, varðandi barnadót, ekki börnin sjálf haha). Svo margt af því sem manni var talið trú um að maður yrði að eiga/hafa þegar ég var að eignast mín fyrstu börn var svo bara óþarfi. Ég held að það sé best að koma sér upp helstu nauðsynjum (rúm/vagga, bleyjur, föt til skiptana, gjafapúði…) og sjá svo bara hvort þörfin á fleira dóti láti kræla á sér… það má þá bara stökkva út í búð eftir því.

Annað sem ég hef tekið eftir er verðlagning á barnavörum í dag miðað við fyrir 10-11 árum þegar ég átti Andreu og Davíð!!! Þessi verðlagning er út úr öllu samhengi við verðbólgu. Til dæmis fór ég í Babysam að skoða vöggur. Það voru engar vöggur til en að sögn starfsfólksins voru nokkrar á leiðinni. Það vildi svo til að starfsstúlkan (sem b.t.w. var mjög almennileg) átti mynd af þeim í bæklingi sem Babysam hafði gefið út árið 2003 (enn að selja sömu vöggur)… hún rétti mér bæklinginn en í honum var ekki bara myndin heldur líka verðið á vöggunni þegar bæklingurinn var gefinn út, 9.900 krónur. Ég spurði af rælni hvað vaggan kosti í dag… u.þ.b.49.000!!!!! Og þetta eru ekki verð með dýnu eða himnasæng… hvurslags eiginlega dónaskapur er þetta?!!! Og á dönsku síðu Babysam kostar þessi vagga DKK 1.299 (u.þ.b. 29.000 ISK). Maður þakkar bara fyrir að eiga flest það sem okkur vantar, ég myndi ekki vilja vera að eignast mitt fyrsta barn í dag án þess að hafa einhverja góða að sem geta lánað manni dótið!

Okei, þá er ég búin að röfla yfir því… aftur að ungbarnapokanum 🙂 – Ég fékk fallegar tölur í Litlu prjónabúðinni. Hafði ekki komið þangað inn áður. Æðisleg búð og æðisleg þjónusta – tekið á móti manni með bros á vör… mæli með ferð þangað! 🙂

Snið: Garnstudio BabyDROPS 18-2 (frítt á netinu)
Stærð: 6-9 mán.
Garn: Drops Eskimo Tweed no 73 (silver grey) – keypti í Föndru, Dalvegi
Magn: ath! gefið er upp 11 dokkur, það er allt of mikið, ég notaði rétt rúmlega 8 dokkur!!
Prjónar: #8.0
Tölur: Litla prjónabúðin