Jæja, samkvæmt blogginu hef ég ekkert sett hér inn síðan 15. október!

Ég sit samt ekkert auðum höndum 🙂 – ég er búin að vera að prjóna peysu á Davíð (bráðum 10 ára), alveg eins og peysuna hans Dags litla. Davíð vildi að hann og litli bróðir hans ættu eins peysur (sætur!)

Svo er ég búin að sauma tvær Swoon blokkir í viðbót. Þær eru risastórar (61 cm) – svo stórar að það er eins og að sauma lítinn dúk að sauma eina blokk. Fjórar komnar, fimm eftir – ég er svoooo ánægð með efnin og mér finnst þau koma dásamlega vel út með þessu mynstri.

Það urðu smá mistök í skurðinum á þessari blokk… sést það?!! 🙂  –  Ég skar óvart tveimur of margar í stærðinni 3,5″ í stað 3 og 7/8″. Nú voru góð ráð dýr því ekki átti ég meira efni, nema smá ræmu sem varð í afgang. Það var því ekkert í stöðunni annað en að sauma viðbót við þessar 3,5″, þetta er jú bútasaumur ekki satt?! 🙂

Fyrsta blokk

Önnur blokk

Þriðja blokk (ég elska þessa!!)

Fjórða blokk (mistakablokkin)

Og þá er það áfram með heimilishald, þvott og kvöldmatarpælingar… en það er allt í lagi því í kvöld ætla ég með Andreu (11) ballerínunni minni í Hörpuna að sjá St. Petersburg balletinn sýna Svanavatnið – Jesús, það sem ég er spennt enda hef ég aldrei séð “alvöru” balletsýningu!! Í hverju á ég að vera? Einhverju samanbútuðu?!!! 😀

Jeiii! Ég er búin með fyrstu Swoon blokkina mína!! 🙂

Fyrir þau ykkar sem vita ekkert hvað ég er að tala um þá er algert Swoon æði í gangi í quilt-bloggheimum. Swoon sniðið er hannað af Camille Roskelley. Camille og mamma hennar, Bonnie eru teymið á bakvið Bonnie and Camille hönnunina. Þær eru ótrúlega flottir efnahönnuðir sem hafa hannað guðdómlegar línur eins og þessar.

Auk þess er hvor þeirra með eigin bloggsíðu. Síðan hennar Bonnie heitir Cotton Way. Ég er nýbyrjuð að skoða hana en ég er alveg húkkt á síðunni hennar Camille, Simplify. Þvílíkir litir, þvílík snið og þvílík afköst hjá þessari konu! Húsið hennar er GEÐVEIKT og einhvern veginn virðist allt sem rennur undan henni fullkomið… ef þið hafið t.d. gaman af “fyrir og eftir” myndum skuluð þið ekki sleppa að skoða þessar myndir, ég er viss um að þið eigið eftir að slefa yfir muninum!

Camille er líka snillingur í að hanna snið og er með þau til sölu hér, bæði á pappírsformi og pdf formi (þá þarf ekki að bíða eftir sniðinu, bara panta, prenta og byrja!)

Eitt af hennar nýjustu sniðum heitir Swoon – sem þýðir yfirlið {skiljanlega} – það er algerlega búið að slá í gegn og alls staðar sér maður sniðinu bregða fyrir á quilt-bloggsíðum. Það er líka búið að stofna nokkrar Swoon grúppur á Flickr þar sem áhugasamar saumakonur (og einstaka karl) setja inn myndir af blokkunum sínum um leið og þær sauma þær. Auðvitað eru þær misfallegar en sniðið er bara svo mikil snilld og gaman að sjá ýmsar útgáfur (blokkirnar hennar Camille finnast mér samt einar þær flottustu).

Ég keypti geggjaðan efnapakka um daginn sem inniheldur 15 “fattara” (Fat Quarter = 18″ x 22″ bútur) og bætti svo við þremur bútum úr safninu mínu því í eitt Swoon teppi þarf 18 fattara. Eftir að hafa horft á efnin ofan á strauborðinu mínu í þó nokkurn tíma hófst ég loks handa við að strauja, skera og sauma. Blokkirnar eru RISA stórar (24″ = 61 cm) og ekki nema 9 stykki í öllu teppinu {teppið er 84″ x 84″ = 213 x 213 cm að stærð}.

Hér er fyrsta blokkin mín (svo ótrúlega glöð með hana!! :)) – hinar koma inn á bloggið um leið og ég sauma þær!